დიგიტალური ჰუმანიტარიის აკადემია-საქართველოს და ფრანკფურტის უნივერსიტეტის  ემპირიული ენათმეცნიერების ინსტიტუტის კავკასიოლოგიის მიმართულების ერთობლივი  რეფერირებადი სამეცნიერო ონლაინ ჟურნალი „დიგიტალური ქართველოლოგია“  – ერიჰ პლუსის“ (ERIH PLUS) აკადემიური ჟურნალების სამეცნიერო ბაზაში შევიდა: https://kanalregister.hkdir.no/publiseringskanaler/erihplus/periodical/info.action?id=507997 .

ჟურნალი 2021 წელს დაარსდა ფრანკფურტის უნივერსიტეტის პროფესორის მანანა თანდაშვილის ინიციატივით და მიზნად ისახავს ქარ­თ­ული ეროვნული მეცნიერების შედარებით ახალი მიმართულების – დი­გიტა­ლ­უ­რი ქართვე­ლო­ლო­გი­ის განვითარების ხელშეწყობას, ქართულ და საერთა­შორი­სო უნი­ვერსი­ტე­ტებ­სა და სხვა­დასხვა აკადემიურ სექტორებს შორის თანამშრომლობის  გაღრმავებას და ქართველოლოგიური კვლევების საერთაშორისო სივრცეში ინტეგრაციას.

ჟუ­რ­ნალს კურირებს საერთაშორისო სა­მეც­ნიერო საბჭო, რომელშიც შედიან მსოფლიოს სხვადასხვა ქვეყნის წამყვანი მეცნიერები: იოსტ გიპერტი, მზექალა შანიძე, ირინა გურევიჩი, ტონი მაკენერი, ბერნარ უტიე, პაულ მოირერი, ნინო ფირცხალავა, ვახტანგ ლიჩელი, თინათინ მარგალიტაძე, მარიამ ყამარაული.

აღსანიშნავია, რომ ჟურ­ნ­ალს   წარ­მარ­თავს სარედაქციო საბჭო, რომელსაც ხელმძღვანელობენ ჟურნალის მთავარი რედაქტორი პროფ. მანანა თანდაშვილი  (ფრანკფურტის გოეთეს სახელობის უნივერსიტეტი) და რედაქტორი პროფესორი დარეჯან თვალთვაძე (ივანე ჯავახიშვილის სახელობის თბილისის სახელმწიფო უნი­ვერ­სიტეტი).  

მანანა თანდაშვილის ინფორმაციით, დღემდე ატვირთულია ჟურნალის სამი ტომი, რომელშიც 19 ქართველი და 23 უცხო­ელი მეცნიერის სტატიაა გამოქვეყნებული.  ჟურნალი ორენოვანია: სტატიები ქვეყნდება ქართულად და ინგლისურად, რაც, ერთი მხრივ, უზრუნველყოფს ქართულის, როგორც სახელმწიფო ენის, საერთაშორისო დონეზე სრულფასოვან ფუნქციონირებას და, მეორე მხრივ, ხელს უწყობს დიგიტალური ჰუმანიტარიის მეტაენის გაქართულებას. 

„ჟურნალის სარედაქციო საბჭო მიესალმება სტატიებს და რეცენზიებს ისეთ სამეცნიერო სფეროებში, როგორებიცაა: დიგიტალური ჰუმანიტარია, დიგიტალური ქართველოლოგია, დიგიტალური კავკასიოლოგია, ციფრული ლექსიკოგრაფია, ხელნაწერთა ციფ­რუ­ლი დამუშავება, მთარგმნელობითი კვლევები, ქართული ენის ტექნოლოგიები, კორპუსლინგვისტიკა, ლიტერატურათმცოდნეობა, ისტორია, არქეოლოგია, პოლიტოლოგია, სოციოლოგია. ჟურნალი მუდ­მი­ვ­ად ზრუნავს ინტერ­დისციპ­ლინუ­რი კვლე­ვებ­ის  წახალი­სებასა და ქართველოლოგ მეცნიერთა ხელშეწყობაზე.  რედაქციაში შემოსული  სამეცნიერო ნაშრომები გადის ორმაგ ბრმა რეცენ­ზი­რე­ბას ქართველი და საერთაშორისო ექსპერტების მონაწილეობით. ჟურნალში სტატიის წარმოდ­გენის ვადაა ყოველი წლის 30 აპრილი.

ვულოცავთ ქართულ და უცხოურ სამეცნიერო საზოგადოებას, ჟურნალის სამეცნიერო და სა-რედაქციო საბჭოს წევრებს,  ჟურნალის ავტორებს კიდევ ერთი ქართველოლოგიური  ჟურნა-ლის საერთაშორისო აღიარებას“,  – აღნიშნავს მანანა თანდაშვილი.