თსუ-ს ფსიქოლოგიისა და განათლების მეცნიერებათა ფაკულტეტის მეოთხე კურსის სტუდენტი ლიზი ბიძინაშვილი ახლახან დაბრუნდა ბერლინიდან, სადაც გაცვლითი პროგრამით სწავლობდა მსოფლიოს ერთ-ერთ წამყვან უნივერსიტეტში – ჰუმბოლტის სახელობის ბერლინის უნივერსიტეტში.

„თბილისის სახელმწიფო უნივერსიტეტი ძალიან მდიდარია გაცვლითი პროგრამებით – ეს ერთ-ერთი მიზეზი იყო, რის გამოც თსუ ავირჩიე და მიხარია, რომ მომეცა შანსი უცხოეთში სწავლისა“, – ამბობს ლიზი. ის ბავშვობიდან სწავლობს გერმანულ ენას და უკვე არაერთ გერმანულ საგანმანათლებლო პროექტში მიუღია მონაწილეობა. მისი თქმით, გაცვლით პროგრამაში ჩართვა ერთ-ერთი ყველაზე მნიშვნელოვანი გადაწყვეტილება აღმოჩნდა მის ცხოვრებაში: „საპროგრამო მოთხოვნებში საფუძვლიანად უნდა გავრკვეულიყავი. ძალიან გვიან წავაწყდი ინფორმაციას და მოკლე დროში მომიწია ყველა დოკუმენტის მოგროვება. ეს იყო საუკეთესო სპონტანური გადაწყვეტილება, რაც კი მიმიღია“, – იხსენებს ის. მეორე ეტაპზე ლიზიმ გერმანულ ენაზე გაიარა გასაუბრება, რომელზეც მისი მოტივაცია, ინტერესები და არჩეული უნივერსიტეტის უპირატესობები განიხილეს. სულ მალე გაიგო სასიამოვნო სიახლე – ის პროგრამაში შეირჩა და ბერლინში სწავლა უნდა გაეგრძელებინა.

მიუხედავად იმისა, რომ მომზადების პროცესი საკმაოდ ინტენსიური იყო, ლიზისთვის უცხოეთში პირველი თვეები  სასიამოვნო გამოწვევებით სავსე აღმოჩნდა: „გადავედი ახალ სახლში, ახალ ქვეყანაში და ვიცხოვრე უცხო ადამიანებთან ერთად, რომლებიც მალევე ჩემი ოჯახის წევრებად იქცნენ“, – ამბობს ის.

ბერლინში სწავლამ მას არა მხოლოდ სხვადასხვა კულტურის, არამედ საკუთარი თავის უკეთ გაცნობის შესაძლებლობა მისცა. „როდესაც პირველადი აღტაცება გადის, ხვდები, რომ მარტო ხარ და ყველაფერს თავად უნდა გაუმკლავდე. ეს გრძნობა ერთდროულად სტრესულია და სასიამოვნოც, რადგან იცი – საბოლოოდ ყველაფერი გამოგივა“, – აღნიშნავს სტუდენტი.

ჰუმბოლტის უნივერსიტეტში ლიზი განსაკუთრებით მოიხიბლა სწავლების განსხვავებული მეთოდებით. „სწავლების სისტემა ძალიან პრაქტიკული იყო – ხშირად გვქონდა ამოცანებზე დაფუძნებული დავალებები, რაც ბევრად ამარტივებდა სწავლის პროცესს. გარდა ამისა, სემინარებზე გვყავდა მოწვეული სტუმრები – ფსიქოლოგიის სხვადასხვა მიმართულების სპეციალისტები, რომელთაც უშუალოდ ვესაუბრებოდით და უამრავ საინტერესო ინფორმაციას ვიღებდით“, – ამბობს ის.

თსუ-ში მიღებულ გამოცდილებას ლიზი დიდ მნიშვნელობას ანიჭებს. მისი თქმით, უნივერსიტეტმა მისცა არა მხოლოდ ცოდნა, არამედ პასუხისმგებლობის შეგრძნება და შესაძლებლობა, ჩართულიყო მრავალფეროვან საგანმანათლებლო პროგრამებში. მიუხედავად ამისა, სტუდენტი მიიჩნევს, რომ ქართულ უმაღლეს განათლებაში პრაქტიკული კომპონენტის გაძლიერება აუცილებელია: „ჩვენთან, სამწუხაროდ, პრაქტიკული დავალებები ძალიან ცოტაა. ვფიქრობ, ამის შეცვლა ბევრად უფრო საინტერესოს გახდიდა ლექცია-სემინარების პროცესს.“

ლიზის გამოცდილება ნათლად აჩვენებს, რამდენად მნიშვნელოვანია ახალგაზრდებისთვის საერთაშორისო პროგრამებში ჩართვა – ეს არა მხოლოდ პროფესიული განვითარებისთვის, არამედ პიროვნული ზრდისთვისაც ერთ-ერთი საუკეთესო შესაძლებლობაა.