საზეიმო განწყობა სუფევდა თბილისის სახელმწიფო უნივერსიტეტის სააქტო დარბაზის ფოიეში, სადაც თსუ-ს ბიბლიოთეკისა და თსუ-ს კულტურისა და სპორტის დეპარტამენტის ორგანიზებით ბავშვთა სახლის აღსაზრდელებისთვის გაიმართა საახალწლო ღონისძიება  – „ახალი წელი უნივერსიტეტში“.

დაახლოებით 150  ბავშვი იღებდა მონაწილეობას პატარებისთვის გამართულ ზეიმზე. მათ მხიარულ განწყობაზე  ზრუნავდნენ   თოვლის ბაბუა, კიკის ანიმატორები და ბავშვებისთვის საყვარელი გმირი ლოკო-მოკოს ლომი.  ზეიმი  მუსიკალურად  ჭოხონელიძეების საბავშვო სტუდიის ბავშვებმა გააფორმეს.

ბავშვებს თსუ-ს ადმინისტრაციის სახელით  თსუ-ს კანცლერი ლაშა საღინაძე,  თსუ-ს რექტორის მოადგილე  კახა ჭეიშვილი  მიესალმნენ და ბედნიერი ბავშვობა და წარმატებული მომავალი უსურვეს.   ბავშვთა მწერალმა ლელა ცუცქირიძემ ბავშვები წიგნის სამყაროს აზიარა. 

„დღევანდელი ღონისძიება  შეიძლება განვიხილოთ როგორც მესამე მისიის ერთ-ერთი ღონისძიება.  უნივერსიტეტში  მოვიწვიეთ  მზრუნველობა  მოკლებული ბავშვები და შევეცადეთ  ეს დღე მათთვის გაგვეხალისებინა. ამ  ღონისძიების ორგანიზატორია  თსუ-ს ადმინისტრაცია და თსუ-ს ბიბლიოთეკის მეგობართა კლუბი და, რაც მთავარია, სტუდენტობა. 5 იანვარს თსუ მათ  კვლავ უმასპინძლებს და  სპეციალურად მათთვის აინთება საახალწლო ნაძვის ხე“, – განაცხადა  თსუ-ს ბიბლიოთეკის დირექტორმა  ზურაბ გაიპარაშვილმა, რომელმაც  პატარებს  ლაღი ბავშვობა და ბედნიერი მომავალი უსურვა.