თანამედროვე სამყაროში, სადაც სოციალური ქსელები, ციფრული პლატფორმები და ხელოვნური ინტელექტი ყოველდღიურად ზემოქმედებენ ჩვენს შეხედულებებსა და გადაწყვეტილებებზე, განსაკუთრებულ მნიშვნელობას იძენს იმის გააზრება, თუ როგორ ყალიბდება საზოგადოებრივი აზრი და რა მექანიზმები ახდენს გავლენას ადამიანზე. სწორედ ამ აქტუალურ საკითხებს ეძღვნება პროფესორ გუგული მაღრაძის განახლებული მონოგრაფია – „სოციალური გავლენების ფსიქოლოგია“.

სოციალური გავლენების შესწავლა გუგული მაღრაძემ ჯერ კიდევ საბჭოთა პერიოდში დაიწყო კონფორმულობის პრობლემის კვლევით. იმ დროისთვის კონფორმულობა დასავლურ სოციალურ მეცნიერებაში ერთ-ერთ ცენტრალურ საკვლევ თემად მიიჩნეოდა, მაშინ, როდესაც საბჭოთა კავშირში ეს მიმართულება პრაქტიკულად უცნობი იყო და შესაბამისი კვლევებიც არ ტარდებოდა, რაც ტოტალიტარული სისტემის პირობებში ბუნებრივ მოვლენად შეიძლება ჩაითვალოს.

კონფორმულობის კვლევისას ავტორმა და მისმა კოლეგებმა თეორიულ საფუძვლად გამოიყენეს დიმიტრი უზნაძის განწყობის თეორია, რაც სოციალური ფსიქოლოგიისთვის მნიშვნელოვანი მეცნიერული სიახლე იყო. შემდგომ წლებში კვლევები გაფართოვდა და მოიცვა ჯგუფში მიმდინარე ფსიქოლოგიური პროცესების ანალიზი. ექსპერიმენტული კვლევების შედეგად პირველად დადგინდა, რომ ჯგუფში სოციალური გავლენა მხოლოდ უმრავლესობის მხრიდან უმცირესობაზე ზემოქმედებით არ შემოიფარგლება, რაც ტრადიციულად კონფორმულობის ცნებაში მოიაზრება. ასევე დადასტურდა, რომ უმცირესობასაც შეუძლია მნიშვნელოვანი გავლენა მოახდინოს უმრავლესობაზე, რამაც სოციალური გავლენის პროცესის უფრო სრულყოფილი და ზუსტი გაგების შესაძლებლობა შექმნა.

მონოგრაფიის ხელახალი გამოცემა განაპირობა თანამედროვე სოციალური რეალობის არსებითმა ცვლილებებმა, რომლებიც დაკავშირებულია ტექნოლოგიების სწრაფ განვითარებასთან და მათი გავლენის ზრდასთან საზოგადოებრივი ცხოვრების ყველა სფეროში. წიგნის განახლებულ გამოცემაში განსაკუთრებული ყურადღება ეთმობა თანამედროვე ტექნოლოგიებისა და ხელოვნური ინტელექტის როლს სოციალური გავლენის მექანიზმების ფორმირებასა და ტრანსფორმაციაში. ამ საკითხების კვლევა დღეს განსაკუთრებულ აქტუალობას იძენს, რადგან ციფრული გარემო და ხელოვნური ინტელექტი სულ უფრო მეტად განსაზღვრავს საზოგადოებრივ ურთიერთობებს, აზრის ფორმირებისა და გავლენის პროცესებს.

წიგნში განხილულია ისეთი მნიშვნელოვანი საკითხები, როგორებიცაა სოციალური გავლენის მექანიზმები; საზოგადოებრივი აზრის ფორმირება; ჯგუფური ქცევა და ლიდერობა; სტერეოტიპები და სოციალური დამოკიდებულებები; აგრეთვე თანამედროვე ტექნოლოგიებისა და ხელოვნური ინტელექტის გავლენა სოციალურ პროცესებზე. ავტორი ამ თემებს არა მხოლოდ თეორიული, არამედ პრაქტიკული პერსპექტივიდანაც განიხილავს, რაც გამოცემას განსაკუთრებულად საინტერესოს ხდის.

„სოციალური გავლენების ფსიქოლოგია“ განკუთვნილია როგორც სტუდენტებისა და მკვლევრებისთვის, ისე ნებისმიერი მკითხველისთვის, ვისაც აინტერესებს ადამიანის ქცევის, საზოგადოებრივი პროცესებისა და თანამედროვე კომუნიკაციური გარემოს თავისებურებების გააზრება.

„დღეს, როდესაც ჩვენი ყოველდღიური არჩევანი ხშირად ალგორითმების, საინფორმაციო ნაკადებისა და სოციალური გარემოს ზემოქმედების ქვეშ ყალიბდება, ამ წიგნის მნიშვნელობა კიდევ უფრო იზრდება. იგი მკითხველს ეხმარება, უკეთ გაიგოს – რატომ ვიქცევით ისე, როგორც ვიქცევით, როგორ იქმნება საზოგადოებრივი აზრი და რა ძალები განაპირობებს ადამიანთა გადაწყვეტილებებს“, – ამბობს პროფესორი გუგული მაღრაძე.

თუ გსურთ, უკეთ შეიცნოთ საზოგადოება, თანამედროვე სოციალური პროცესები და საკუთარი ქცევის საფუძვლები, გუგული მაღრაძის „სოციალური გავლენების ფსიქოლოგია“ ნამდვილად იმ წიგნთა შორისაა, რომლებიც აუცილებლად უნდა წაიკითხოთ.

წიგნის შეძენა შესაძლებელია ივანე ჯავახიშვილის სახელობის თბილისის სახელმწიფო უნივერსიტეტის მაღაზიაში (პირველი კორპუსის ფოიეში).