თბილისის სახელმწიფო უნივერსიტეტში ყველა პირობაა შექმნილი იმისთვის, რომ აღმოსავლეთ აზიის ქვეყნებით დაინტერესებულმა სტუდენტებმა შესაბამისი  განათლება მიიღონ. ამ კუთხით აღსანიშნავია, რომ უნივერსიტეტის მეხუთე კორპუსში, საქართველოში ჩინეთის და იაპონიის საელჩოების ფინანსური მხარდაჭერით, გახსნილია ჩინური და იაპონური კაბინეტები, რომლებიც უახლესი თანამედროვე ტექნიკით,  სათანადო სამეცნიერო და მხატვრული ლიტერატურით, პერიოდული გამოცემებით არის აღჭურვილი. სტუდენტებისათვის დიდი სტიმულის მომცემია ის ფაქტიც, რომ ხსენებული საელჩოების მიერ ჩატარებულ ტესტირებებში გამარჯვებული წარჩინებული სუდენტები  ჩინეთის და იაპონიის წამყვან უმაღლეს სასწავლებლებში მიემგზავრებიან სწავლის გასაგრძელებლად მიმწვევი მხარის სრული დაფინანსებით – ეს ინფორმაცია კიდევ ერთხელ გახმაურდა  28 – 29 ოქტომბერს თსუ-ში გამართულ საერთაშორისო კონფერენციაზე – „აღმოსავლეთ აზია ისტორიულ და თანამედროვე კონტექსტში“, რომელიც ჰუმანიტარულ მეცნიერებათა ფაკულტეტის  შორეული აღმოსავლეთის რეგიონმცოდნეობის მიმართულების ორგანიზებით ჩატარდა. სამეცნიერო კონფერენცია მიეძღვნა შორეული აღმოსავლეთის რეგიონმცოდნეობის  მიმართულების დაარსების 15 წლისთავს და საქართველოს იაპონიასთან და ჩინეთთან დიპლომატიური ურთიერთობების დამყარების 30 წლის იუბილეს.

როგორც კონფერენციის ორგანიზატორმა, შორეული აღმოსავლეთის რეგიონმცოდნეობის მიმართულების ხელმძღვანელმა, პროფესორმა ნანა გელაშვილმა აღნიშნა, წლევანდელი, რიგით მე-7 კონფერენცია განსაკუთრებულად მრავალფეროვანი და შინაარსობრივად აქტუალური თემატიკით გამოირჩეოდა, რადგანაც ის მიეძღვნა აღნიშნული მიმართულების დაარსების საიუბილეო თარიღს.  

,,სტიმულის მომცემია ის გარემოება, რომ დარგის მიმართ სტუდენტების მხრიდან იკვეთება სულ უფრო მზარდი ინტერესი, რამდენადაც იაპონისტიკა და სინოლოგია ერთ-ერთ დიდი პოტენციალის მქონე სპეციალობებად მოიაზრება საქართველოში. დღევანდელი კონფერენციის მიზანია იაპონიის, ჩინეთის, კორეის და აზიის სხვა ქვეყნების ისტორიის, კულტურის, ეკონომიკის და სხვა სფეროების აკადემიურ დონეზე და სიღრმისეულად წარმოჩენა, მკვლევართა გამოცდილების და აზრების გაზიარება,  სამომავლო კონტაქტების და ურთიერთსასარგებლო შეხვედრების დაგეგმვა“,  – აღნიშნა ნანა გელაშვილმა.

სამეცნიერო კონფერენციაზე მისასალმებელი სიტყვები წარმოსთქვეს  თსუ-ს ჰუმანიტარულ მეცნიერებათა ფაკულტეტის დეკანმა, პროფესორმა ნანა გაფრინდაშვილმა, აღმოსავლეთმცოდნეობის სასწავლო-სამეცნიერო ინსტიტუტის ხელმძღვანელმა დარეჯან გარდავაძემ და სხვებმა, რომლებმაც წარმატებები უსურვეს კონფერენციის მონაწილეებს. კოლეგებისა და დამსწრე საზოგადოების წინაშე  თავიანთი ნაშრომები წარმოადგინეს: თსუ-ს პროფესორმა ნანა გელაშვილმა (ინოვაციები იაპონიის პოლიტიკურ ცხოვრებაში და კულტურაში  – კამაკურას ეპოქა);  ფილოლოგიის მეცნიერებათა დოქტორმა, თბილისის თავისუფალი უნივერსიტეტის პროფესორმა მარინე ჯიბლაძემ  (ჩინური ენის ფონეტიკის საკვანძო საკითხები); თსუ-ს ასოცირებულმა პროფესორმა, ისტორიის მეცნიერებათა დოქტორმა მარიკა მშვილდაძემ (იუდეველთა თემების ინდოსტანის ნახევარკუნძულზე შესწავლის საკითხისათვის);  თსუ-ს  პროფესორმა ნოდარ ბელქანიამ (მოძველებულია თუ არა დღეისთვის განათლების ჰემბოლდტისეული იდეალი?); ისტორიის მეცნიერებათა დოქტორმა, თსუ-ს ასოცირებულმა პროფესორმა ლეილა ხუბაშვილმა და  თსუ-ს დოქტორანტმა  ალექსანდრე უბირიამ (დემოგრაფიული აფეთქების პრობლემა და მისი გადაწყვეტის გზები შორეული აღმოსავლეთის ქვეყნების მაგალითზე); თსუ-ს ასისტენტ-პროფესორმა ნანა გულიაშვილმა (მშვენიერება და ხელოვნება იაპონურ ესთეტიკაში); თსუ-ს დოქტორანტმა, ჩინური ენის მოწვეულმა ლექტორმა ანა გოგუაძემ  (ტრავმის რეპრეზენტაცია იუ ხუას რომანში  – ცხოვრება) და სხვ.

ჩინეთის თანამედროვე საკითხებზე მეტად საინტერესო მოხსენებები წარმოადგინეს შორეული აღმოსავლეთის რეგიონმცოდნეობის კურსდამთავრებულებმა, ამჟამად დამოუკიდებელმა სინოლოგმა ახალგაზრდა მკვლევრებმა, რომლებმაც წარმატებით დაასრულეს მაგისტრატურის სრული კურსი ჩინეთის წამყვან უნივერსიტეტებში – ოთარ ჭიღლაძემ, ნელი ახობაძემ, შალვა ჩიხლაძემ და თეონა გელაშვილმა.

წელს განსაკუთრებით მნიშვნელოვანი იყო ის ფაქტი, რომ კონფერენციის მუშაობაში ზუმის საშუალებით ჩაერთვნენ უცხოელი სპეციალისტები სხვადასხვა ქვეყნიდან: სინოლოგი, დამოუკიდებელი მკვლევარი  მაი აშური (ეგვიპტე, ქაირო)  – ,,გამოწვევები და მათი გადაჭრის გზები ჩინურ ლიტერატურულ თარგმანში“;  ისტორიის დოქტორი, ტოკიოს მეტროპოლიტენის უნივერსიტეტის პროფესორი ჰიროტაკე მაედა (იაპონია, ტოკიო)  – ,,მიშიმა, ჰაიაში და გალაკტიონი – იაპონურ-ქართული ლიტერატურული ურთიერთობის ერთი ეპიზოდი მეოცე საუკუნეში“; თბილისის თავისუფალი უნივერსიტეტის კონფუცის ინსტიტუტის ჩინური ენის ლექტორი ლიუ ჩაო (ჩინეთი, პეკინი)  – ,,ჩინური ძირითადი ფერების აღმნიშვნელი სიტყვების კულტურული მნიშვნელობის ანალიზი“  და სხვ. 

კონფერენციის ორგანიზატორის, პროფესორ ნანა გელაშვილის ინფორმაციით,  სასიამოვნო სიახლეს წარმოადგენდა ისიც, რომ წარმოდგენილი ქვეყნების  ენითა და კულტურის შესწავლით საჯარო სკოლებიც დიდ დაინტერესებას ამჟღავნებენ. ამის დასტურია, რომ ორი საჯარო სკოლის მოსწავლეებიც დაესწრნენ კონფერენციის მუშაობას და მათთვის საინტერესო ბევრი ახალი ინფორმაცია მიიღეს.