ახალი მონოგრაფია – „საქართველო: ტრავმა და ტრიუმფი დამოუკიდებლობისკენ მიმავალ გზაზე“
შურთხია ბეროშვილი
„საქართველო: ტრავმა და ტრიუმფი დამოუკიდებლობისკენ მიმავალ გზაზე“ — ამ სახელწოდებით დაიბეჭდება მონოგრაფია, რომელიც შოთა რუსთაველის ეროვნული სამეცნიერო ფონდის ფუნდამენტური კვლევების საგრანტო პროექტის ფარგლებში მომზადდა. პროექტზე თსუ-ის ჰუმანიტარულ მეცნიერებათა ფაკულტეტის კულტურის კვლევების სასწავლო-სამეცნიერო ინსტიტუტის მკვლევართა ჯგუფი (პროფ. ნინო ჩიქოვანი, ასოც. პროფესორები ქეთევან კაკიტელაშვილი, ივანე წერეთელი, ირაკლი ჩხაიძე, ასისტ. პროფ. მაია ქვრივიშვილი, დოქტორანტი ქეთევან ეფაძე) მუშაობდა.
პროფესორ ნინო ჩიქოვანის ინფორმაციით, ნაშრომში, კულტურის კვლევათა პარადიგმულ ჩარჩოში, შესწავლილია საბჭოთა კავშირის უკანასკნელ და დამოუკიდებლობის პირველ წლებში საქართველოში განვითარებული პროცესები. ჰუმანიტარულ და სოციალურ მეცნიერებებში დაგროვილი ცოდნა, გამოქვეყნებული ემპირიული მასალა და კვლევის პროცესში მოძიებული მონაცემები გაანალიზებულია კოლექტიური მეხსიერებისა და კულტურული ტრავმის თეორიათა, ასევე, გამარჯვების ტრავმის კონცეფციის ჭრილში.
წიგნი შედგება შესავლის, ექვსი თავისა და დასკვნისაგან, მოიცავს ქართულ და ინგლისურ ტექსტებს, ერთვის ვრცელი ბიბლიოგრაფია. მასში განხილულია 80-იანი წლების მეორე ნახევარსა და 90-იანი წლების დასაწყისში ქვეყანაში მიმდინარე პროცესები, 1989 წლის 9 აპრილი, როგორც პარადიგმული მოვლენა, მისი რეზონანსი, თბილისის ომი და სამოქალაქო დაპირისპირება, 90-იანი წლების ტრავმული გარემო, ყოველდღიურობა, როგორც ტრავმა, ტრავმისა და ტრიუმფის ასახვა მხატვრულ ტექსტებში და ამ უკანასკნელის როლი როგორც ტრავმის კონსტრუირებაში, ასევე მის დაძლევაში.
დასკვნაში შეჯამებულია საქართველოში კოლექტიური მეხსიერებისა და კულტურული ტრავმის შესწავლის მიმართულებით განხორციელებული ერთ-ერთი პირველი ფუნდამენტური კვლევის შედეგები, რომლებიც საბჭოთა კავშირის დაშლისა და საქართველოს დამოუკიდებლობის მოპოვების პერიოდს ეხება.
ნაშრომის პრეზენტაცია 6-7 მაისს ბუდაპეშტში, ცენტრალური ევროპის უნივერსიტეტში შედგა.
